Сирийская анафора (двенадцати) апостолов (прототип анафоры свт.Иоанна Златоуста)

Страницы работы

1 страница (Word-файл)

Содержание работы

Сирийская анафора (двенадцати) апостолов
(прототип анафоры свт.Иоанна Златоуста)

(по Н.Д. Успенскому)

[Praefatio]

Достойно и праведно Тя пети, Тя благословити, с Единородным Твоим Сыном и Святым Духом; Ты от небытия в бытие нас привел еси, и отпадшыя восставил еси паки, и не отступил еси вся творя, дондеже нас на небо возвел еси, и Царство Твое даровал еси будущее. О сих всех благодарим Тя, Тя и Единороднаго Твоего Сына и Святаго Духа.

[Sanctus]

Тебе предстоят окрест херувими четыри лица имущии, и серафими шесть крил, хвалу величия немолчными устами и непрестанными гласы со всеми небесными силами славяще и поюще и взывающе и глаголюще: Свят…

Свят еси и пресвят с Единородным Твоим Сыном и Святым Духом. Свят еси и пресвят в величии славы Твоея,

[Post-Sanctus]

Иже тако мир возлюбил еси, якоже Сына Твоего Единороднаго дал еси, да всяк веруяй в Него не погибнет, но имать живот вечный;

[Institutio]

Иже пришед, и все еже о нас смотрение исполнив, в нощь, в нюже предаяшеся, приемь хлеб во Своя руки и воздвиг я к небеси и благословив, освятив, преломив, даде святым Своим учеником и апостолом, рек:

Приимите, ядите от него вси вы, сие есть Тело Мое, еже за вы и за многия ломимое и даваемое во оставление грехов и в жизнь вечную.

Подобне и чашу по вечери растворив от вина и воды, благодарив, благословив, освятив и вкусив от нея, даде учеником Своим и апостолом, рек:

Пийте от нея вы вси, сие есть Кровь Новаго Завета яже за вы и за многия изливаемая и даемая во оставление грехов и в жизнь вечную.

Сие творите в Мое воспоминание. Елижды бо аще ясте хлеб сей и чашу пиете, смерть Мою возвещаете и воскресение Мое исповедаете, дондеже прииду.

[Anamnesis]

Поминающе убо, Владыко, спасительное изволение всего домостроительства Твоего, еже о нас бывшее: крест, тридневное из мертвых воскресение, на небеса восхождение и седение одесную величествия Отца и второе славное Твое пришествие, егда приидеши со славою судити живым и мертвым и воздати всем человеком по делом их с человеколюбием,

Церковь Твоя и стадо Твое молит чрез Тебе и с Тобою, глаголя Отцу Твоему: помилуй мя. И мы, Господи, приемлющий милость, приносим Тебе благодарение за вся и по всему.

[Epiclesis]

Посему просим Тя, всемогущий Господи и Боже святых сил, простирающеся ниц пред Тобою, ниспосли Духа Твоего Святаго на предлежащия приношения,

и покажи хлеб сей честно́е Тело Господа нашего Иисуса Христа,

и чашу сию Кровь Господа нашего Иисуса Христа;

якоже быти всем причащающимся от них в жизнь и воскресение, и оставление грехов и исцеление души и тела, и просвещение разума и в надежду на страшнем суде Христа Твоего.

[Intercessio]

И да никтоже от народа Твоего отпадет, соделай ны, Господи, достойны безмятежно послужити Тебе, да пребывая в служении Тебе вся дни живота нашего, насладимся Твоих небесных, вечных и животворящих Таинств ради милости Твоей, Твоего милосердия и человеколюбия ныне, и присно и во веки веков.

Похожие материалы

Информация о работе